Бир куни шер, бўри ва тулки овга чиқиб, улар сигир, кийик ва қуён овлашди. Шер бўрига: "Ушбу овни орамизда қандай тақсимлаймиз?" деган эди, бўри шерга: "Жуссага қараб ҳисса ажратамиз. Эй шер, сен катта жуссали бўлганинг учун сигирни ол. Тулки кичик жуссали бўлгани учун қуённи олсин. Мен ўртача жуссали бўлганим учун кийикни олай", деди. Шер бўрининг сўзидан аччиғи чиқиб, унинг юзига бир тарсаки тортган эди, бўрининг кўзи ўрнидан чиқиб кетди. Шер тулкига қараб: "Сенинг фикринг қандай? Буни тақсимоти қандай бўлади?" деган эди, тулки: "Эй шер! Сен бизнинг ҳожамиз ва подшоҳимизсан. Қуён нонуштанг, сигир тушлигинг ва кийик кечки овқатинг бўлақолсин", деди. Шер: "Эй тулки, фикринг нақадар ажойиб! Айтгинчи, бу ҳикматни қаердан ўргандинг", деган эди, тулки: "Бу ҳикматни мен бўрининг кўзидан ўргандим", деб жавоб берди.